Скопје, 15.09.2026 — Самостојниот синдикат на вработените во универзитетските клиники, центри, клинички болници и други јавни здравствени установи во Република Македонија (ССКЦ) достави до министерот за здравство д-р Сашо Клековски три барања што се однесуваат на платите и на колективните договори во јавните здравствени установи.
1. Нов Колективен договор за вработените во јавните здравствени установи (арх. бр. 0302-95/1) — важечкиот колективен договор за здравствената дејност во значителен дел не соодветствува на актуелната организација, кадровска состојба и услови за работа, ниту на новите стандарди за правата на вработените во јавниот сектор. ССКЦ бара Министерството да покрене постапка за изработка и склучување нов договор и да формира работна група со претставници на Министерството, Фондот за здравствено осигурување и репрезентативните синдикати.
2. Работна група за толкување и примена на колективните договори (арх. бр. 0302-97/1) — исти одредби се толкуваат различно од установа до установа, особено кај додатоците на плата, дежурството и прекувремената работа, регресот, јубилејните награди и работниот стаж. ССКЦ бара паритетна работна група, по урнекот на комисијата предвидена со членовите 42 и 43 од Општиот колективен договор за јавниот сектор.
3. Изземање на јавните здравствени установи од пресметката на плата преку ИСУЧР (арх. бр. 0302-96/1) — поради непрекинатиот 24-часовен режим на работа и најсложената структура на додатоци во јавниот сектор, ССКЦ бара Министерството да покрене иницијатива пред Министерството за јавна администрација и пред Владата за изземање од модулот за пресметка на плата во ИСУЧР, со задржување на постојниот начин утврден со колективните договори.
Сите три барања ги потпиша претседателот на ССКЦ, прим. д-р спец. Предраг Серафимоски.
ССКЦ ќе ги информира членовите за одговорите на Министерството и за понатамошниот тек на иницијативите.